జీవన సత్యం

 అన్నీ తెలుసు అనుకునే ఓ మనిషీ

నీ పయనమెచటికి


అన్నిటికీ దేవుడా అంటావు
అన్నీ నావే అంటావు


కష్టసుఖాలు అన్నీ తెలుసు అంటావు
వాటి కుదుపులకు నలుగుతావు


ప్రేమంటే ఇవ్వడం అంటావు
ఇచ్చింది మళ్ళీ కావాలి అంటావు


కాటికి పరుగులు తప్పదు అంటావు
ఎప్పటికీ నీ వారితో ఉండాలనుంది అంటావు


అంతః సౌందర్యం అందం అంటావు
అద్దం లో చూసి మురిసిపోతావు


బంధాలు సమయానుగుణంగా మారతాయి అంటావు
అవే బంధాలు కనుమరుగు అవుతుంటే కంటి నిండా విలపిస్తావు


జీవితమే మాయ అంటూ వల్లిస్తావు
అదే మాయా చట్రంలో జీవిత గమనాన్ని వెతుకుతావు


అన్నీ తెలుసు అనుకునే ఓ మనిషి
జీవన సత్యం తెలుసుకో నేటికి

ఒంటరిగా పుట్టిన ఓ మనిషీ
చివరంట నీకు నీవే ఎప్పటికీ


~ చలం లక్కప్రగడ

Comments

Post a Comment

Popular posts from this blog

అసమర్ధుని ఆలాపన

లేవరా లే కదలరా కదులు రేపు నేడయ్యింది నేడు మోడయ్యింది బతుకు బరువయ్యింది గుండె ఇరుకయ్యింది॥ భీరువని నినుతలచి విడచెదరు జనులు మరిరారు నీదరికి సతీసుతులు॥ కదలరా ధైర్యమ్ము నెయ్యమైదలచి నడువరా నువునమ్ము భయములను విడచి॥ కదిలేటి నినుజూచి వరియించు జయలక్ష్మి॥ కదలరా నీగుండె ఘల్లుమనిపించి నడవరా నిశివీధి దారులను త్రుంచి॥ రేపు నేడయ్యింది నేడు మొదలయ్యింది॥ విధినేడు నినుజూచి తలలువంచింది తొలితూర్పు నీకనుల తలుపు తట్టింది॥ లేవరా సుకుమార సౌధమ్ము విడచి నడవరా నిశివీధి దారులను విడచి॥ ~ చలం
Read more

నేను చూసిన నిజాలు

కదిలే అలలు అలలపై తేలే కలలు ఆశగా ఎగిరే పక్షుల సంగీతం హాయిగా నవ్వే పిల్లల నవ్వులోని మకరందం చిన్ని చిన్ని దారులు ఆ దారులలో జనుల పరుగులు బ్రతుకుకై మనుషల పోరాటం ఎగరలేక ఆగిపోయే పక్షుల ఆరాటం ఆకలితో ఆశగా ఎగిరే పక్షులను  చేతిలో గింజలతో వశపరచుకునే మానవ నైజం. మనిషికి పక్షులు లోకువ మనిషికి మనిషే లోకువ మూసుకున్న కంటి నుండి జాలువారిన గంగా ప్రవాహం గంగమ్మ సుడుల ఒరిపిడికి ఎర్రబడ్డ శుక్లపక్ష చంద్ర బింబం ~ చలం
Read more

అకాల వర్షం

అకాల వర్షం అకాల వర్షం అకాల వర్షం కురిసింది.. మేడలు మిద్దెలు సన్నని దారులు నింగిని నేలను ఏకం చేస్తూ అకాల వర్షం కురిసింది.. అకాల వర్షపు నిశీధి బాటన ఎండీఎండని చిటారు కొమ్మన తడితడి రెక్కల బేలచూపులతొ బిక్కుబిక్కుమన కూర్చుని భయపడెనో పాలపిట్ట.. తోటి పిట్టలు సాటి పక్షులు వదలిపోగా మరచిపోగా.. అకాల వర్షపు మెరుపులవెలుగున కృష్ణమేఘముల భీకరగర్జనన జీవనగమనం కనిపించింది జీవితసత్యం నలుదిక్కులన.. వినిపించింది ధ్వనియించింది దిగంతరాళములు దద్దరిల్లేలా ప్రతిధ్వనియించింది తనతో పెరిగిన తనతో నడిచిన తనతో ఆడిన పక్షులు లేవని తనతో రావని ఒంటరి పక్షి వగచింది.. వర్షపుచినుకుల కలిసి కారిన కన్నీటినిగని నగియింది.. నిశీధివేళన నిద్దురవదిలి బంధాలన్నీ నీడగతలచి కోటలువదిలి ఊళ్లనువదిలి సత్యాన్వేషణమార్గంతెలిసి అన్నీ త్యజించి తననే జయించి సిరివాహనమీ అర్భకపక్షికి  ఆశ్రయమైంది  ఆయువయింది.. అకాలవర్షం అకాలవర్షం  అకాలవర్షం కురిసింది సత్యం తెలుపుతు సర్వం కలుపుతు గంభీరంగా సాగింది జీవనపాఠం నేర్పింది జీవితచిత్రం చూపింది… ~ చలం
Read more